應節^^

農曆新年將至, 換下個版面應下節

完成電療 ^^

終於完成14次電療啦

今日最後1次順手見埋醫生做下賽後檢討 ;

因為要等顧問醫生, 又係邊瞓邊等左2個半鐘

得到預期效果 -> 止痛 

連止痛藥都可以唔食 ; 好好了

可以瞓平又改善到睡覺質數 ; 太好了

有而家既效果唔洗再補電住

再傾下d腿骨股骨, 暫時冇咩嚴重問題 ;

條腿冇力好大原因係之前手術+電療另其退化,

基本冇乜野可做 ; 相對其他呢個係小問題,唔理住

約埋1個月後照X-RAY +覆診跟進.

好咯, 可以休息下 ; 呢個半月真係比較攰, 1個星期要去

5日醫院. 我地雖然去醫院好近, 不過阿j體能唔好, 都好攰.

呢個半月阿j有病樣了, 之前都冇見過咁病look 情緒唔好,

隔日就會好down會喊, 電左幾次我覺得唔對路, 同醫生提出

食抗抑鬱藥,食左又確係好d. 情緒正常返. 而家終於頂哂. 來

緊我要更小心安排飲食. 希望盡快可以幫阿j恢復體力. 開開

心心過年呀.  其他計劃都過埋年先再打算.

係度要讚下幫阿j果幾個電療師先,佢地好好,因阿j腳不便,

背同手有d角度屈唔到, 唔可以自己上落電療床,佢地不但止

好溫柔扶佢, 成日提佢慢慢除衫慢慢黎唔洗急. 而且佢地比我

陪埋入去幫手上落床. 電完張床都未下降就叫定我入去企係隔

離等. 每次3個人. 扶岩位置就一齊數123..出力 --- 多謝哂

贈送有需要朋友

贈送給有需要既朋友

~ 真係唔洗客氣 ; 岩用就留言啦.

6 罐裝 全新prosure 橙味 ~每罐380g可以沖5杯250cal飲品

expiry date 2008 - 6月

http://www.cancernutrition.com.hk/

2盒 全新oral impact ~ 每盒有5packs

expiry date  2008 - 3月

http://www.oralimpact.com.hk

1-31- 2007 以上物品己分贈數位有用朋友

進步中

阿j呢幾日已經可以同睡床親親啦! 感恩

佢可以瞓平了. 雖然仍要墊起其中一條腿,不

過好得多了. 食埋安眠藥, 都叫可以熟睡

胃口仍唔好. 而家阿j廋左好多. 磅重更係新低點

固體食物只可食小碗仔, 除左中藥, 小量湯水, 靠

幾包高營養果汁 + 保礦力頂住. 咩都試過, 阿j真

係食唔落. 我已出盡平生所學, 都冇計可施

有次試開1小杯加營素, 1 飲即痾加勁肚痛

唯有等完成14次電療再開行turbo谷肥了. 

仲有4次 ~ 倒數中 ~ 快啦快啦,下星期二完成.

到時唔理醫生講咩, 都一定要停停休息回氣先.

現時基本3得有返2得 ; 有進步咯 ~

肚痛都輕微左 ; 好有進步咯 ~

我唔貪心 ~ 慢慢來 ~ 唔好急 ~ 既攻且守

當22遇到爺爺

22豬好黐人  亦唔可以被受冷落 

佢坐係隔離你唔摸佢, 佢會喵到你頭暈

今日就由爺爺 = 阿j "曖" 22瞓覺覺

grandma=我呢, 當時正在努力進行歲晚前大清潔中, 今

日首先洗哂全屋窗門再拆哂窗簾去乾洗 ~ 之後累極

一家幾口齊齊晏覺

仍有2個星期過年, 希望一日做d一日做d ~

兇猛招式

電療副作用真係勁. 基本上由第1次已經出招而

且越加兇猛. 對阿j來講, 比化療時辛苦好多.

每次電療後攪肚痛 ~ 冇胃口+瞓唔到

基本3得中冇左2得 ~ 精神體力下降

問過哂相關朋友+醫生 ~ 答案一致 ;

而家電療位置直接影響腸臟郁動多而引致的. 做

哂電療之後就唔會肚痛.

而家仍係見招拆招中 ;

瞓唔到 ~ 我地出安眠藥

肚痛     ~ 我地有止肚痛藥+中藥

胃口     ~ 精簡食物 + 中藥

幸好冇嘔冇肚瀉, 否則唔知點接招咯

不過電療亦總算有預期中效果 阿j背痛同腹痛都冇左.

已經可以停食止痛藥.  亦因阿j都感到有效,佢唔想停電.

而家已經電左7次了, 我地倆個唯有互相安慰已經頂左一

半. 好快完成.

接招

呢幾日忙住同電療副作用玩遊戲

星期五做第1次, 阿j夜晚已感覺攪肚痛

~ 即刻食埋醫生預先開出止肚痛藥

星期六做第2次, 中午喉嚨痛+攪肚痛+夜晚仲作嘔作嘔咁添

~ 成晚就揸住個檸檬睇無線季選了.

再加埋腰痛. 岩岩夠1柗麻雀腳

幸好昨日休息 ,不適感覺好左小小.

今日做第3次, 可能適應左. 感覺又好多小小

定左連續電5次就停一停. 阿j要頂多2次先可以小休咯

副作用已出招, 我就要比心機接招了

上星期已拿拿林搵埋中醫幫手接招 ; 希望頂得住

我就煲定一大壺馬蹄竹蔗茅根水清熱 ; 希望有d幫忙.

朋友話喉嚨痛未必關事, 因為電療位置距離遠,可能係作感冒症狀;

今晚沖左杯陳年咸桔水比阿j飲, 睇下明天有否好轉. 再作定案

按電療schedule, 我地應該可以係農曆年前完成14次

電療~落實

今日接到QE來電, 明天下午有期開始電療了. 比預計早左好多,

因為前日姑娘講最快都要下星期尾先有期.  感恩 梗係越快越好啦.

前日返QE覆診, 因為要等高級顧問醫生.等左3個幾鐘.不過好值得等.

落實電療14次, 即時做埋紋身定位.

如我所願可電淋巴 會電胸口以下腹部. cover左大部份胰臟,肝同胸

腔淋巴. 醫生話原來腎臟好敏感係唔可以電療.太近都唔得. 所以腎

臟對落有部份肝電唔到. 以阿j呢個電療範圍, 有好大機會減弱左阿j

十分一既腎功能. 不過醫生強調呢個影響好細微,唔需要擔心.

再同醫生傾過, 顧問醫生話阿j個腎冇癌腫.

加上2個幾好既消息 ;

1 阿j個股骨唔係太差, 暫定完成個腹部電療後再跟進, 如有須要再電,

   已安排埋過年後再照.

   [上次講侵蝕得幾嚴重 ; 嚇到我地由其阿j唔敢再自己行. 出街帶車車.

     加上前個星期有日阿j係床轉身時大腿劇痛後就行唔到,即同中醫講

     轉左中藥,上星期開始又可行得返 ]

2 腰骨腿骨亦冇問題

   [ 阿j因腹背受敵,己有2個星期唔可以瞓平, 背脊要墊高,差唔多好似

     坐係度瞓咁, 等我以為脊骨都有衰野 ]

醫生認為阿j腰骨痛楚都係因胰臟同淋巴腫影響神經線引發.

阿j而家食返止痛藥, 所以冇劇痛, 但仍keep住隱隱作痛, 非常擾人.

現階段主力要止痛. 只要唔痛, 先有力有意志再戰.

係電療呢段日子, 我首要任務係保持阿j目前狀態, 準備轉換適合電

療時用既湯水. 再加上中醫配合. 希望阿j體能好d又可開始學習氣功.

暫時第一步目標->爭取電淋巴已達

唔洗出去C+做電療 ; 慳返好多錢呀

落實電療schedule, 對上京之行可望快d有明確行程

明天開始踏出第1步, 祈望一切順利