30天了

爸爸 ~ 明天你搬去新居了. 

           我買左扎好靚既花給你.你既花我收得多了. 今次係我第1次買比你.

爸爸 ~ 明天我有機會擁你入懷了.

爸爸 ~ 早前看你發給我的短訊我落淚了 ~~  內容是 [ 媽媽不要哭.... ]

爸爸 ~ 我仍在閉關中, 未開始返公司. 每日隨心吃喝玩樂哭睡.

爸爸 ~ 個個都驚我寂寞, 電話日日響不停呢.

爸爸 ~ 你個大孫呢期係按摩椅尿尿呀, 2次呀 ! 洗到我隻野咁呀.

爸爸 ~ 你個大仔呢期愛上keyboard, 時時同我爭呀.

爸爸 ~ 我有新玩具, 唔等 iphone 了. 買左samsungF488. 我知你都一定鐘意.

            我地一直電話齊齊換, 用埋同款式. 而家我部新既就形單影隻了....

爸爸 ~ 我裝回全身鏡子了, 用我自己的方法, 都幾穩固架. 不過廁所鏡仍未裝回,

            有難度. 要親朋出手了.

爸爸 ~ 有日個門鎖柄甩左出來, 幸好曾見你安裝, 我自己攪掂左.

爸爸 ~ 今日個洗衣機底又漏了少許水出來, 我忘記了你之前如何修復. 唔知點整

           不過我叻呀,  沒有觸境傷情. 沒有哭 ~ 我踢左佢一腳同佢講, 唔好蝦我.否則掉

            左你,買過果新既 !

爸爸 ~ 岩岩又落雨呀, 你唔好成日同我地玩水啦, 上次接你時已經係黑雨了....

爸爸 ~ 好想你 !

心路歷程

一開始發病時, 希望不是癌症 ,

知道是癌症時, 希望不是後期 ,

確實是後期時, 希望有藥續命 ,

到沒藥可用時, 希望會有奇蹟 ,

當奇蹟破滅時, 祈求不會痛苦 ,

當面臨離別時, 唯祈望會好走 .

因為癌,   改變了我原有生活 ,

               改變了我部份性格 .

               改變了對生命睇法 ,

               更加帶走了我最愛 .

面對無法改變的事實, 唯一可做的就是順變好了.

節衷其實是節不了, 唯有用時間令我適應習慣吧.

故事

一男一女在家睇外國家居裝修節目, 女的見其中介紹的奶茶色睡房好靚,

隨口跟男的講 [ 幾靚喎,下次裝修可以諗諗 ]

幾日之後, 女的晚上回家, 如常入房. 當時男的在廳中看電視, 女的覺得

房間有點不同, 但又講不出有什麼不同, 亦不以為意.  之後如常的坐在男

的身傍閒聊..

一陣子後, 男的開口問  [ 你唔覺有咩唔同左咩 ]

女的  [ 好似有,但又唔知係咩 ] 又反問男的有什麼不同呢…

男的沒好氣地帶女入房指住牆壁

換來是一陣歡呼笑聲 ………… 是一間奶茶色的房間

爸爸, 雖然呢間奶茶色房間唔係現在的屋, 不過我依然好記得果隻 [ 奶茶色 ]

思念雖然是心痛

回憶卻全是美好

爸爸, 今日8號風球, 突然想起我2年少時在打風日子揸電單車去海邊睇浪

~ 年少輕狂 ~ 幸運我輕狂的日子有你相伴

手作仔

嘿嘿 係我經過幾日努力既成果因為冇衣車, 只可手縫  

好想即刻去買架衣車 明明幾秒鐘既事 手縫成個鐘

不過我好滿意呀. 個個都話好cute

我從來唔同5Bs用頸圈因為香港買到既我都唔覺靚, 最鐘意去日本site

睇, 因為佢地d頸飾真係好cute好靚, 奈何我睇中果d全部唔ship出國.. 

咁岩有日去行spotlight見到d好靚既絲帶1時心血來潮買返來自家製

BiBi ~ 衫領加隻小bow 因佢係大個仔丫

 

妹妹 ~ 用左格仔絲帶突出d

大大 ~ 小紳士

22 ~ 好女仔既粉紅色

44 ~ 都係好女仔既粉紅色,不過佢唔肯影相呢

 

爸爸見到一定會即講

嘩嘩嘩 BB 好靚仔喎....未見過咁靚仔既貓喎

嘩嘩嘩 妹妹好靚女喎.... 未見過咁靚女既貓喎

佢對住隻隻b都係咁講架

 

爆笑對話

阿j係最後一段日子中, 仍有好多令我地爆笑的對話同場面. 

~  在睡夢中嚥嗚, 各人非常緊張, 我哄阿j時,發現沒有眼淚的.

    就安撫各人   [ 冇眼淚架, 佢發夢 ~ 假架  ]

    阿j突然出聲  [ 真架,有眼淚架....]

    即時 ~~ 全場爆笑 ~~

~  家姐哄阿j  [ 你唔廋呀,都係咁靚仔咁高大呀 ]

    阿j   [ 靚仔就唔多覺啦, 高大又唔講得囉 ~ 普普通通啦 ]

~  我安慰阿j安心時, 佢會低泣 ; 

    我唔怕死, 不過我唔捨得媽媽, 我好愛媽媽   [當時我好心甜架, 誰知下一句…..

    我唔要媽媽做…老姑婆……    [ 即時變為哭笑不得…..

~  我安慰阿j叫佢記得要好好過新生活, 快d識新朋友  [ 阿j答好  ]

    再叫佢要靚靚仔仔快d去識個女仔 ~ 溝下女….

    阿j 話  [ 唔要, 我唔要其他女人, 只要媽媽來陪我….

    我 : 下, 你要去既地方媽媽唔去得住喎, 不如你搵個新女朋友先啦,

            等媽媽來到, 你再飛左佢囉

    阿j : 好呀

~  我同阿j閒聊佢新居地點位置時

     阿j  [ 話只要係媽媽選的我就鐘意 [ 下一句…]   不過要孖位, 我要同媽媽一齊住…. 

     我  : 下, 我未住得架喎, 你要自己住先, 等遲下媽媽來到, 先一齊再住啦..

     阿j : 咁好啦…

~   我同阿j閒聊衣服選擇時..

     同你著返平時你最愛既型仔look好唔好 ?

     阿j : 好

     我搵哂你平常最愛的既衣服跟你好唔好 ?

     阿j : 好, 媽媽選的我就鐘意

     咁要唔要多套西裝 ?

     阿j : 唔要, 我都唔鐘意著既.

仍有好多點滴, 不過太長篇, 單單文字難以表達當時爆笑情形.

而家回憶起以上片段我仍會會心微笑

阿j真係好厲害架, 佢雖已走, 但留下不少開心回憶比我.

我相信只要調理好心境, 生離死別前對話未必只有傷心淚水的.

想像~事實

15日了....

曾經以為阿j離去,我會手足無措

~ 原來事實又不是, 要做的我做足了, 要安排的我已盡能力安排妥當

曾經以為阿j走後, 我會茶飯不思, 夜夜難眠

~ 原來事實又不是, 我仍會肚餓,仍會眼瞓..

曾經以為阿j走後, 我會想盡快搬走, 怕面對間屋會太太太難受.

~ 原來事實又不是, 起碼沒想像中那麼難受,我想仍可在此屋生活的.

曾經以為沒法面對沒有阿j的大床

~ 原來事實又不是, 我仍可入睡房仍可熟睡.

曾經以為沒法面對舊時照片, video

~ 原來事實又不是, 由第1日開始, 我已可以不斷睇我2照片, 看著阿j同

   喵喵玩的片段, 仍感受到阿j的笑聲.

曾經以為面對靈堂, 心會更難受

~ 原來事實又不是, 那2天, 淚水確實不多, 我不多步出大堂, 不多跟到

   來朋友閒聊, 只是把握最後機會不斷跟阿j講說話.

 

反之有些從未沒有想像過的, 可能因沒心理準備,令我更難過.

~ 到醫院取臨時文件時, 心好難過. 手握紙張落淚了.

~ 到生死註冊處時, 每填一欄都令我好難受好難過, 由我親手寫上阿j一生

   感覺痛苦.

~ 望見阿j的身份証上打上的一圓孔, 我好難過, 手握正式死亡証,我又好難過.

~ 昨天收到來電通知阿j的灰灰到了. 我實在不喜歡”骨灰”呢2個字, 心痛了.

  [ 灰飛煙滅 ] 4個字即時在腦海出現.

來緊我相信再一次觸動我的. 是7/1日了. 雖然2個地方是可自行做交收的, 不

過我選擇親自到長生店接阿j到新居, 阿j喜歡我陪在他身邊. 我亦好珍惜呢個

機會可跟阿j如此貼近. 而且是我最後可為阿j做的事了.

 

爸爸, 今日收到運輸處寄來你的續牌通知書 ~~~ 我有點兒唏噓呢.

疲憊

近2日感覺非常疲憊, 過去over-drawed 的energy, 開始要償還了....

近2日淚水多了…. 我獨自在家品味思念, 任由回憶侵襲....

 

爸爸, 昨晚在夢中的情境, 最後我2緊緊相擁. 醒後我仍瀝瀝在目....

爸爸, 我考慮緊旅行地點, 不過唔知而家飛呢 ? 定 1號之後飛好呢 ?

思念

思念中....

j媽曾在夢中見到你背部....

我家姐曾在夢中跟你交談, 她問你新環境如

何,而你用慣常吋咀回答.內容是如此實在....

很開心, 她們都見到你健康的外型樣子.

而我只曾在睡夢中聽到你叫我名字....

 

新居定了

今日下午在家無所事事. 約埋j媽j妹去幫阿j選擇新居位置.

其實地點早已有決定  ~  淨土園

2年前我爺爺都係選擇呢度, 當時我地睇左唔少地方.

最後我家人都係最滿意呢度.  阿j亦好鐘意呢個地方.

環境好開楊舒服. 外型美觀, 屋仔唔迫夾.  

不過2年前後已升值一倍了…

位置選擇亦少了很多…

幸好仍有幾個心水位置.

最後我們3人一致通過.  

爸爸 ~ 7/1 日搬新屋了… 媽媽選擇你實鐘意既

完結了

隨著喪禮順行完滿結束, 我真真正正陪阿j走完了他的一生. 手指

在按制上最後一句 " 爸爸..拜拜."而劃上句號, 以後阿j將會活在我

心內一角了. 我真真正正要從新踏上我生活軌跡了. 要學習更要從

新適應, 過去19年來一直有阿j相陪,在我背後遮風擋雨. 雖然未能

同行至白首, 但曾經擁有我心仍是幸福.

阿j由離去至今只有9日, 短短8日內完結一切,我都不禁對阿j相片笑

笑講聲 “你都好趕時間下喎…. ”

~ 彌留至走, 短短數小時 ~ 好快

~ 後事日子, 又幸運可安排得 ~ 好快. [可能知我唔鐘意佢做冰鮮爸爸 ]

貫徹阿j性格 ~ 快手快腳, 坐言起行….

原本打算帶齊5Bs星期六一同到醫院接阿j,不過撞正黑雨, 唯有只帶

阿j最鍚既BiBi. 阿j真係好掛住個仔, 經常掛在口邊又不時看5Bs照片.

我地上星期已偷運BiBi到醫院見阿j. 前日又有BiBi相接,我相信阿j會更

開心了.

呢段日子. 我要感謝好多好多人好多好多事.

~ 感謝我家人, 好幸運好幸福做到你地女兒,細妹. 沒有你們支持相陪,

   我沒可能如此輕鬆. 更多謝你們一直包容我任性舉動.

~ 感謝j媽j妹, 一直以來對我信任同愛護, 令我毫無顧慮安排所有事.

~ 感謝到來相送所有朋友, 在靈堂當日不時出現人龍在門口排隊, 阿j

   有如此多朋友送別, 應不枉此生了.

~ 感謝我朋友們, 你們一句24小時stand by, 已足夠了.

~ 感謝cc. 呢個一定要點名, 你所做的. 我無言感激.. 老友,收到嗎.

~ 感謝幫我們安排後事的所有人, 真的好好. 安排好貼身, 好用心.

爸爸, 雖然你只有40年人生, 但當中有美好過程有完美結局, 你唔應

          該再貪心了.  記住呀 ! 帶住所有愛好好過新生活啊

安排好了

阿j後事安排好了.

很順行 ; 只用了昨午的半日時間

很快     ; 就是即將來臨的星期六

心情是

~ 期待 ;  因為可以相見

~ 忐忑 ; 不知變化如何

~ 害怕 ; 因為是最後道別

~ 悲傷 ; 以妻子身份送最後一程, 之後永遠不能觸摸了....

感受

因前2天假期關係, 醫院文件未出, 沒事可做

在家看看相片 ~ 有心甜有觸動

跟親朋閒聊過往點滴 ~ 哭泣中仍夾雜不少笑聲

接親朋慰問來電 ~ 傷感中帶來不少溫暖, 不過因來電多而令我聲音沙了

看網友留言 ~ 令我心有暖意

這2天淚水中夾雜不少笑聲, 因我有一個愛生事家庭, 每每可令大家在

悲傷流淚中仍會爆出笑聲.

而我就想流淚就流淚, 想睡就睡, 想食就食, 任隨我思緒我心帶領.

來緊開始著手安排後事, 不過都不是什麼煩事, 因我同阿j早已商量好

衣物新居了, 所有都是他喜愛的. 我要阿j保持型仔過新生活,.而且有

了之前爺爺的經驗,現在的一條龍安排是很好的.

回看此段抗癌日子直至今天, 我仍然深感我2是幸福幸運的.

是自我安慰嗎 ?是阿Q嗎 ? 絕對不是.

雖然阿j是因病而逝, 而我是失去了最愛, 但是

我明白,生;病;死 從來不由自主.

我懂感恩, 明白別人付出不是必然的. 而我2幸運身邊有如此多人愛護.

我明白什麼叫 "放下", 現在或許未完全學會, 但已有所領悟

Something End ~ Something begin

Something   ~~~  Never change